Sar so ano savorre demokratikane thema, vi an-i Kosoviaqi vakerlin i debàta sikavel o politikano ʒivdipen k-i akaja nevi republìka. Maj baro gèndo e deputetenqo phende so sas ćalǎrde kotar o raporto e Kosoviaqe raipnasqo. Sar vi aʒukǎrel sas pes, i opozìta kerda kritìke p-i trine ćhonenqi buti e raipnasqiri. I maj bari kritìka sas so o raipen nas le nijekh butǎqo plàno akala trin ćhon so nakhle. Kotar e minoritètǎ, nùmaj o presidènto e rromana partiaqo Haʒi Zylfi Merʒa lias i vòrba. Metaforaça, na bute lafěnçar, aj godjaveripnaça, o rromano deputèto sikavda so biripnaça aj sarkondivesutne butǎça śaj te aresel pes baxtagor.

Pana jekh 8-to Grastornaj mukhlam palal amende. Evociripen p-e nakhle berśa, vakǎripen vaś o Rroma thaj olenqi perspektìva, gili, poèzia, muzìka, Oktèto „Mystic Ilo“, fudbàli, dràma, sa akala sas elemènte kolençar maladilam kotar i data 6 ʒi k-o 9-to Grastornaj 2008. Naśti te das nòta, kova berś adikǎrdilo maj laćhes akava berśuno vaj berśa maj angle. Śaj te phenas nùmaj so akava berś sas maj but evenimèntǎ thaj o rromano dives adikǎrdilo 4 divesa.

Vaś e Rroma e Kosoviaqe te arakhen jekh normàlo situàcia aj buti, kamlol pes e ćhave te irinǒn and-e śkolaqe bànke. And-o Prizren, o Lolo Truśul e Spaniaqo aj odova e Kosoviaqo berśençar śirdie progràme vaś e ćhave save mukhle i śkòla te astaren o nivèli lenqe amalenqo. I redàksia e Nevipe Kosov@-qi kerda jekh ankèta.

Kosoviaqo bajràko: I rang bodli, Kosovaqi màpa gàlbeno, aj 6 ćexrenǎ kola prezentuinèna e Kosoviaqe khetanimàta. O rroma kotar o civìlo sektòri, an-o draft konsituciaqo dokumento, maj baro akcènto dende k-i rromani ćhib. O Peter Faith, phiravela i Eulex-esqi komisia ani Kosòvia. Isi othe rroma? An-i Kosòvia maj phare e rromenqe kotar o enklave. E Kosoviaqi rromani politika aćhili paxome, bi nijekhe efektosqo.